UBUTUMWA UBUYOBOZI BW’URUNANA RW’ABAHARANIRA UBUMWE NA DEMOKARASI / RALLY FOR UNITY AND DEMOCRACY KU MUNSI ABANYARWANDA BIBUKA IMYAKA MIRONGO ITANDATU N’INE U RWANDA RUSUBIRANYE UBWIGENGE.
Banyarwanda, Banyarwandakazi,
Kuli uyu munsi, taliki ya 1 Nyakanga nibwo U Rwanda rwasubiranye ubwigenge. Niyo mpamvu mw’izina ry’Urunana rw’Abaharanira Ubumwe na Demokarasi / Rally for Unity and Democracy/ Ralliement pour l’Unité et la Démocratie(RUD-Urunana) na Rassemblement Papulaire Rwandais (RPR) Inkeragutabara dufatanyije mu mpuzamashyaka rya National Democratic Congress (NDC) / Congrès National pour la Democratie (CND) / Inteko y’Igihugu iharanira Demokarasi ngirango mbifulize isabukuru nziza.
Banyarwanda, Banyarwandakazi,
Twibukiranye. Mu mwaka wa 1897 nibwo igihugu cy’Ubudage cyigaruriye U Rwanda nyuma ababiligi bacyirukanamo abasilikare b’abadage mu mwaka wa 1916. Umuryango witwa League of Nations wahaye Ububiligi ububasha bwo gutegeka U Rwanda intego ali ukugirango itegure igihugu cyacu kwigenga yishyiliraho abayobozi bacyo nta banyamahanga bagomba kubaha amategeko. Nyuma y’intambara ya kabili y’isi Umuryango w’Abibumbye (United Nations) wongeye gusaba Ububiligi gutegeka U Rwanda aliko intego iba gutegura ubwigenge.
Banyarwanda, Banyarwandakazi,
Mu gihe aba banyamahanga bategekaga, babikoraga babinyujije mu butegetsi bwa cyami bwali busanzweho. Ubu butegetsi bwali bushingiye ku bwami bw’abatutsi bakomoka mu bwoko bw’Abanyiginya. Abatutsi rero ntabwo aliko bose bategekaga cyakora halimo amoko nk’ane Abagesera, Abaha, Abakono, n’Abega, bo mu bwoko bw’Abatutsi bavagamo umugabekazi. Abo nibo basangiraga ubutegetsi bwa cyami. Abandi baturage basanzwe, Abahutu, Abatutsi bakennye n’Abatwa bategekeshwaga igitugu cyarangwaga cyane cyane n’ubuhake, uburetwa, n’ikoro. Kuli iki gitugu abakoloni bongeyeho akazi, ivangura rishingiye ku moko mu mashuli no mu kazi ka Leta. Ugasanga ubutegetsi kavukire bwarahindutse umuyoboro wa gahunda y’abakoloni. Ibi bikavuga ko Abatutsi bamwe bakoreshwaga mu gukandamiza rubanda rugufi.
Banyarwanda, Banyarwandakazi,
Ubutegetsi bumeze gutyo ntabwo abanyarwanda babwihanganiye ali Abatutsi, Abahutu n’Abatwa. Ali nayo mpamvu abanyabwenge icyenda bo mu bwoko bw’Abahutu bakoze inyandiko basobanura uko ikibazo cy’ubukandamize giteye bagasaba ko hakorwa ivugururwa mu rwego rw’ubutegetsi noneho Abanyarwanda bose bagafatwa kimwe mbese bakareshya imbere y’amategeko. Iyi nyandiko niyo abanyamakuru n’abasesenguzi bise Manifeste des Bahutu. Abagaragu b’ibwami bakuru bashubiije iyi nyandiko bavuga ko kuva kera Abatutsi bigaruliye ibihugu byategekwaga n’Abahinza bivuga abami b’abahutu, ko Abatutsi n’Abahutu ntaho bahuliye mbese ko ali nta sano bafitanye (no brotherhood) kuko Abatutsi ali Ibimanuka bikomoka kuli Sabizeze na Mututsi. Iyi mvugo cyakora ntawavuga ko yali iyo Abatutsi bose kuko hali Abatutsi batemeraga ayo mahomvu halimo nk’igikomangoma Prosper Bwanakweli kuko nabo babonaga ko impindura y’imiyoborere ali ngombwa cyane.
Banyarwanda, Banyarwandakazi,
Havutse amashyaka yitwa Movement Democratique Republicain Parti de l’Emancipation Hutu (MDR PARMEHUTU), Association pour la Promotion de la Masse (APROSOMA), Rassemblement Democratique du Rwanda (RADER) na Association pour le Relevement Democratique des Batwa (AREDETWA) asaba impinduka. Abashyigikiye ubwami bashinze Union Nationale Rwandaise (UNAR).
Banyarwanda, Banyarwandakazi,
Abayobozi ba UNAR bahereyeko basaba ubwigenge. Aliya mashyaka yandi ati reka tubanze twikize igitugu cy’ubwami noneho n’ubwigenge bukulikireho. Iki kibazo ntibacyumvikanyeho. Ahubwo Ingabo z’Umwami zali zarasheshwe ku butegetsi bw’Ababiligi zarisuganyije maze zihiga kandi zica abifuzaga impinduka bo muli MDR PARMEHUTU na APROSOMA. Ibi byaje kuvamo imvururu zo muli 1959 mujya mwumva noneho zihilika ubutegetsi bwa cyami. Umuryango w’Abibumbye wasuzumye ibyabaye mu Rwanda noneho utegeka Ububiligi gukoresha Referendum / Kamarampaka k’ubwami no kuli Kigeri V Ndahindurwa maze abaturage bahitamo Republika. Kw’itariki ya mbere Nyakanga 1962 U Rwanda rusubirana ubwigenge.
Banyarwanda, Banyarwandakazi,
Abarwanyije impinduka bali mw’ishyaka rya UNAR. Aba baje guhunga bagerageza kwigarulira ubutegetsi bitwa INYENZI (Ingangurarugo yiyemeje kuba Ingenzi). INYENZI zaje gutsindwa. Abakomoka kuli UNAR ndetse n’abalunari nka Pierre Mungarulire na Michel Kayihura baje kugaruka bafite isura nshya n’ubushobozi buhanitse bitwa Rwandan Patriotic Front (RPF) maze batera U Rwanda kw’itariki ya 1 Ukwakira 1990 babifashijwemo na Uganda bahilika ubutegetsi bwali buyobowe na Perezida Yuvenali Habyarimana muli Nyakanga 1994. Kw’itariki 6 Mata 1994 RPF inkotanyi zarashe indege yali itwaye Perezida Yuvenali Habyarimana na Perezida w’Uburundi Cyprien Ntaryamira igihe yiteguraga kugwa ku kibuga Gregoire Kayibanda International Airport i Kigali. Intambara Inkotanyi zashoje yarangiye habaye itsembatsemba n’itsembabwoko. Ubutegetsi buhinduka mu muvu w’amaraso atagira ingano.
Banyarwanda, Banyarwandakazi,
Nyuma y’imyaka mirongo itatu n’ibili, RPF Inkotanyi ili ku butegetsi hali ibintu bibi zakoze tudashobora kuvuga ngo tubirangize. Dore zimwe mu ngero:
- imilima y’abaturage yatwawe na Leta;
- abaturage bategekwa guhinga igihingwa gifitiye inyungu RPF na Perezida Paul Kagame uyiyiboye mbese n’uburetwa;
- abaturage, abanyamakuru n’abanyapolitiki badatekereza nka RPF na Kagame balicwa cyangwa bagahunga;
- abaturage barazimizwa cyangwa se imirambo yabo igatoragurwa muli ruhurura, mu bihuru cyangwa mu mazi;
- abaturage bamwe basangwa bamanitswe mu mazu;
- imitungo y’abaturage Leta irayitwara ku ngufu;
- iyozwabwonko rihoraho ryigishako Abahutu ali babi;
- kwibuka byabaye gushyira imbere ubwoko bumwe bugashinja ubwoko bw’Abahutu genocide yakorewe Abatutsi ;
- guhimbira umuntu ibyaha atakoze ;
- kwitwara cyami : mwibuke ko ku gihe cy’ubwami habagaho umwami n’umugabekazi bagategeka bombi, ubu Paul Kagame yigize umwami maze umugore we Nyiramongi yitwara nk’umugabekazi.
Banyarwanda, Banyarwandakazi,
Mu mateka y’ubwami bw’Abanyiginya, U Rwanda rwabaga buli gihe mu ntambara n’ibihugu byo mu karere, rusahura, rwica, cyangwa rwigarulira ubutaka. Ibi byali byarahagaritswe n’abakoloni. Uyu muco waragarutse. Ubu U Rwanda rukoreshwa n’ibihugu byo mu mahanga hamwe n’ibigo by’ubucuruzi bikomeye maze rukohereza ingabo kujya gusahura no gutsemba abaturage. Niyo mpamvu rwigaruliye ubutaka bwa Repubulika Ya Demokarasi ya Kongo. RPF Inkotanyi yahinduye urubyiruko igikoresho cyo kwica no kwiba mu bindi bihugu.
Banyarwanda, Banyarwandakazi,
Abakoloni baje muli Afrika bashaka isoko, imitungo kamere ndetse n’aho batura hafite ubuzima bwiza aho batemebera bareba inyamaswa kandi bahumeka umwuka mwiza bakarya neza maze aba-nyafurika bakababera abaja. Ubu RPF Inkotanyi na Kagame batangiye guhindura U Rwanda igihugu gituwe n’abanyamahanga. Abanyarwanda baragenda gahoro gahoro bahindurwa abaja abatabyemeye bagatorongera. Abandi bavanwamo ingingo zo gucuruza kuburyo nkubu umunyamahanga ushaka impyiko ayigulira akanayihererwa mu Rwanda.
Banyarwanda, Banyarwandakazi,
Turasabwa ko dukora impinduka kuko ntabwo ali ba mpatsibihugu bazabidukorera. Ubwigenge ntabwo. Ubu mu Rwanda ruyobowe na RPF Inkotanyi na Kagame nta burenganzira bwo kubaho, kwiteza imbere, kwishima, cyangwa gusenga. Tuzilikane rero ibihe tulimo maze dushake uburyo bwose bushoboka twigobotore ingoma y’igitugu ya RPF Inkotanyi na Kagame.
Imana ikomeze ihe Abanyarwanda umugisha kandi ituyobore mu gushaka icyazana Ubumwe n’Amahoro mu baturarwanda b’ingeri zose no gukora ibikorwa bifitiye Abanyarwanda bose n'Akarere kwose akamaro.
Bikorewe i Washington, DC, Taliki ya 1 Nyakanga 2026
Dr. Jean-Marie Vianney Higiro
Umuyobozi w’Urunana rw’Abaharanira Ubumwe na Demokarasi (RUD-Urunana) / Rally for Unity and Democracy /Ralliement pour l’Unité et la Démocratie
Mw’izina rya National Democratic Congress (NDC) /Congres National pour la Democratie (CND) / Inteko y’Igihugu Iharanira Demokarasi igizwe na Urunana rw’Abaharanira Ubumwe na Demokarasi (Rally for Unity and Democracy / Ralliement pour l’Unité et la Démocratie (RUD-Urunana) na Rassemblement Populaire Rwandais (RPR - Inkeragutabara)
e-mail:
web: http://www.ndcnd.org
